სიმბოლურად ბავშვთა საერთაშორისო დღეს მერიისგან საჩუქრები მიიღეს ქალაქში მცხოვრებმა უდედმამო ბავშვებმა.

 

ერთ-ერთ მათგანს, ასლან ჯიჯავაძეს 500-ლარიანი ფულადი დახმარება და ტკბილეული მერიის ჯანდაცვისა და სოციალური სამსახურის წარმომადგენლებმა პირადად მიუტანეს. უკვე გადაწყვეტილი აქვს, რომ ამ თანხით კომპიუტერს შეიძენს.

 

ფულად დახმარებას ბათუმში მცხოვრები კიდევ 18 ბავშვი მიიღებს. "მრავალშვილიანი ოჯახებისა და უდედმამო ბავშვებისთვის ერთჯერადი მატერიალური დახმარების" პროგრამა გასულ წელს ამოქმედდა. თანხის ოდენობა თავდაპირველად 400 ლარით განისაზღვრა, წელს კი ასი ლარით გაიზარდა.

 

მერიის სოციალური სამსახურის უფროსის თქმით, პროგრამა მომავალშიც გაგრძელდება და დახმარების თანხაც კიდევ გაიზრდება. მერიამ წელს პროგრამისთვის ბიუჯეტიდან 52 ათასი ლარი გამოყო.