ბათუმის 2018 წლის მთავარი ფინანსური დოკუმენტი დამტკიცდა
2017-12-26
ქ. ბათუმის მუნიციპალიტეტის საკრებულომ 2018 წლის ბიუჯეტი დაამტკიცა. ფინანსურ დოკუმენტს 6 -ის წინააღმდეგ, საკრებულოს 17-მა წევრმა დაუჭირა მხარი.
ბიუჯეტის პროექტის წარდგენამდე ბათუმის მერმა ლაშა კომახიძემ საკრებულოს წევრებსა და სხდომაზე დამსწრე საზოგადოებას სიტყვით მიმართა. ბიუჯეტის პროექტი მერიის საფინანსო სამსახურის უფროსმა არჩილ ვანაძემ წარადგინა.
საკრებულოსთვის წარდგენამდე, 2018 წლის ბიუჯეტის პროექტი მერიამ დაინტერესებულ საზოგადოებასთან ერთად, ეტაპობრივად, პრიორიტეტული მიმართულებების შესაბამისად განიხილა.
2018 წლის ბიუჯეტი 153 მილიონ 774 ათასი ლარით განისაზღვრა.
წარმოდგენილი პროექტით, ბიუჯეტის თითქმის ნახევარი, 74 მილიონამდე ლარი ინფრასტრუქტურულ პროგრამებზეა გადანაწილებული, რაც გულისხმობს კომუნალური ინფრასტრუქტურისა და სერვისების, საგზაო ინფრასტრუქტურის განვითარებას; ბინათმესაკუთრეთა ამხანაგობების მხარდაჭერასა და ქალაქის გარეუბნებში შესაბამისი ინფრასტრუქტურის მოწყობას.
დაახლოებით ერთი მილიონი ლარით გაიზარდა ჯანმრთელობისა და სოციალური უზრუნველყოფის პროგრამებისთვის გათვალისწინებული ბიუჯეტი, რომელმაც 13 მილიონ 178 ათას 400 ლარი შეადგინა.
14 მილიონ 900 ათასი ლარი განათლების მიმართულებითაა გათვალისწინებული. აღნიშნული პრიორიტეტის ფარგლებში დაფინანსდება სკოლამდელი და ზოგადი განათლების, ასევე, პროფესიული განვითარებისა და უმაღლესი განათლების ხელშეწყობის პროგრამები.
კულტურის, ახალგაზრდობის ხელშეწყობისა და სპორტის პროგრამების მხარდაჭერისთვის 12 მილიონ 300 ათასი ლარია გათვალისწინებული.
მომავალი წლის ბიუჯეტში 11 მილიონ 700 ათასი ლარი ქალაქის სოციალურ-ეკონომიკური და სივრცითი განვითარებისთვის არის გამოყოფილი. ამ მიმართულებაშია გათვალისწინებული სატრანსპორტო სისტემისა და სერვისის განვითარებაც.
